രണ്ട്‌ സമം ഒന്ന്

മഴ മിന്നലില്‍ നിന്നടര്‍ന്നു
വീണതു പോലെയോ,
മിന്നല്‍ മഴയിലൂടുതിര്‍ന്നു
വീണതു പോലെയോ,
എതെന്തെന്നറിയാത്ത-
യൊരു നിമിഷത്തിലാണ്
രണ്ടു വന്‍കരകളിലൂടെ,
സമാന്തരമായൊരു പുഴ
കരകവിഞ്ഞൊഴുകിയത്;
നനഞ്ഞുണങ്ങിത്തുടങ്ങി-
യിടത്ത് വളര്‍ന്നു, പടര്‍ന്ന്
ഒരു പുല്മേടുണ്ടായി.
മേഞ്ഞിട്ടും മേഞ്ഞിട്ടും
തീരാതെ,
കയറ്റവും ഇറക്കവുമായി
ദൂരേയ്ക്ക്, ദൂരേയ്ക്ക്...
ഇടയില്‍ രണ്ടൊറ്റമരങ്ങള്‍,
ഇലകള്‍ വിരിച്ചു,
വേരു പടര്‍ത്തി,
എത്തിപ്പിടിക്കാനാവും,
വല്ലാതെ വിയര്‍ക്കുന്നു...
മഴയൊഴിഞ്ഞിട്ടും
ഓര്‍മയില്‍
പെയ്തു കൊണ്ടേയിരിക്കുന്നു...